Morgunblaðið - 18.05.2002, Page 31

LISTIR
MORGUNBLAÐIÐ LAUGARDAGUR 18. MAÍ 2002 31
LISTAHÁSKÓLI Íslands hýsir
þessa dagana sýningu útskriftar-
nema skólans. En þessi árlega sýn-
ing er jafnan kærkomið innlegg í
menningarflóru höfuðborgarsvæðis-
ins og ekki hvað síst fyrir þann fjöl-
breytilega hóp sýningargesta sem
hún dregur að sér. Fólk sem að öllu
jöfnu lætur myndlistarsýningar sig
litlu varða mætir til að kynna sér
verk nemenda og er það vel.
Eflaust gera margir sýningagest-
anna sér ferð í skólann til að skoða
verk vina og ættingja. Aðrir heim-
sækja hins vegar sýninguna ár eftir
ár. Óhamin sköpunargleði, fjörlegt
ímyndunarafl og frumleg fram-
kvæmd eru líka gjarna aðalsmerki
þessara sýninga. Og þó vissulega
geti verið nokkur munur á milli ára,
tryggir sá fjölmenni og fjölbreytilegi
hópur sem þar sýnir að flestir ættu
að geta fundið eitthvað við sitt hæfi.
Útskriftarsýning Listaháskólans í
ár er með svipuðu sniði og áður. Alls
sýna 56 nemendur þar verk sín að
þessu sinni og líkt og fyrri daginn
skapar hrátt rými skólans umhverfi
verkanna. Í fyrsta sal breiðir ský Jó-
hönnu Helgadóttur (textíl), í verkinu
Skjól og ský letilega úr sér á móti
áhorfendum í þrívíðri dýpt vöfflu-
saumsins, á meðan Umbrot Halldóru
G. Árnadóttur (keramik) veltur fram
úr horni salarins í formi misleitra
leirhnúða sem ýmist þyrpa sér sam-
an eða leita frá fjöldanum.
Líkt og fyrri ár eru verk nemenda
misvel úr garði gerð og misjafnlega
mikið lagt í frágang þeirra. Sum
verkin eru hrá, á meðan mikið er lagt
í útfærslu annarra, og í þriðja stað-
inn er það svo hugmyndin sjálf sem
er fyrir öllu. Blönduð tækni og
óhefðbundnir skúlptúrar halda þá
áfram að njóta töluverðra vinsælda
meðal nemenda og setja innsetning-
ar, myndbandsverk og gjörningar
óneitanlega svip sinn á sýninguna.
Ágætis dæmi um innsetningar eru
verk þeirra Hugins Þórs Arasonar
(skúlptúr) og Bjarna Þórs Sigur-
björnssonar (skúlptúr) og er ekki
laust við að bæði verkin búi yfir tölu-
verðum húmor. Í Sjálfsmynd Hugins
er uppblásnum rauðum nælonbún-
ingi, sem listamaðurinn sjálfur
íklæddist við opnunina, komið fyrir á
svart-hvít köflóttum palli og í hinum
Íslenska her Bjarna er fallbyssa
samsett úr ryðguðum járnbútum
samfara myndbandsverki. Í kjarn-
yrtum texta sýningarskrár afneitar
Bjarni síðan listinni og kallar sig
fyrrverandi listamann. Verk Mel-
korku Þ. Huldudóttur (fjöltækni),
Senur úr kvikmyndum sem ekki eru
til, nýtir einnig myndbandsformið.
Með grænum pluss tjöldum við inn-
ganginn vekur listakonan upp ímynd
kvikmyndahússins, á meðan hefð-
bundinn kokteill spennu, kynlífs og
átaka bíður fyrir innan.
Þá kjósa þau Aron Reyr Sverris-
son (málun) og Margrét M. Norðdal
(málun) að fara óhefðbundnar leiðir
við túlkun sína á málverkinu. Aron
Reyr lætur skugga og birtu mynda
verk unnin úr hvítu plasti á upplýst-
um grunni, og Margrét býður upp á
brot úr verkum sínum sl. tvö ár.
Verða málverkin sem hluti af inn-
setningu í meðförum listakonunnar
sem kemur þeim fyrir í rýminu
ásamt skóm, gluggarúðum og fleiri
hversdagslegum munum. Nokkuð er
þá um að nemendur í grafískri hönn-
un taki á lokaverkefnum sínum með
nýjum hætti og er strætóskýli Jó-
hanns Ómarssonar (grafísk hönnun)
skemmtilegt dæmi um verk er ekki
fellur að snyrtilegum umbúðum aug-
lýsingamennskunnar.
Ógjörlegt væri með öllu að gera
þeim stóra hóp nemenda sem út-
skrifast úr skólanum full skil, en þær
miklu vinsældir sem sýningin nýtur
ár hvert, sannar betur en nokkuð
annað að hún á fullt erindi við ís-
lenskan almenning.
Óhamin sköpunargleði
MYNDLIST
Listaháskóli Íslands
Sýningin er opin daglega frá kl. 13–18.
Henni lýkur 20. maí.
ÚTSKRIFTARSÝNING LHÍ
Anna Sigríður Einarsdóttir
Morgunblaðið/Árni Sæberg
Hvítt hljóð eftir Sigríði Dóru Jóhannsdóttur.Altari vatnsins e. Kristínu Vilborgu Sigurðardóttur.