Árbók Landsbókasafns Íslands - Nýr flokkur - 01.01.1992, Page 102

102
FINNBOGI GUÐMUNDSSON
og skammar, ef hann gæti og þyrði. En hann er aðalmaðurinn í
þessu fylki, sem menn snúa sér til í þeim efnum; hann er og
aldavinur Goggins, sem æðstur er í menntamáladeild Norðvestur-
héraðanna. Að vori ætla ég mér að reyna að komast að vinnu við
járnbrautamælingar. - Ef ég skipti um heimili í vetur, læt ég þig
vita af því með sendibréfi.
Kristján Stefánsson í Winnipeg hefur enn ekkert skeyti fengið
frá Guðm. Friðjónssyni. Utanáskrift til mín verður (fram í miðjan
apríl-mánuð næstkomandi): - 535 Elgin Ave. Winnipeg, Man.
Svo óska ég þér gleðilegs nýárs af heilum hug.
Pinn einlægur
Stephan Guttormsson.
Þorvaldur Þorvaldsson fæddist 4. janúar 1879 og dó fyrir aldur fram snemma árs 1904,
þá í framhaldsnámi við Harvardháskóla. Foreldrar hans voru Þorvaldur Þorvaldsson og
Þuríður Þorbergsdóttir, er bjuggu á Rein í Skagafirði og síðar í Goðdölum, en fiuttust
vestur um haf 1887 og settust að í Árnesbyggð í Nýja íslandi.
Stephan Guttormsson minntist hans í Lögbergi 18. febrúar 1904 og segir þar í lokin:
„Skynsemin var honum ekki einhlít. Hann átti hjarta.
Það sem einkenndi Þorvald öðru fremur var sterkur vilji og þrek. Hagsýnn var hann í
bezta lagi, starfsþolið frábært. Hann átti miklum vinsældum að fagna. Hann hertók hugi
manna og hafði lag á að halda þeim föstum. Heföi hann því orðið fyrirmyndarleiðtogi, ef
honum heföi orðið lengra lífs auðið.“
Roberts skáld: Sir Charles George Douglas Roberts (1860-1943), eitt fremsta skáld
Kanadamanna.
Hr. Stephan G. Stephansson,
Tindastóll, Alta.
Cold Springs, Man.
8. maí, 1902.
Góði vinur!
Kæra þökk fyrir síðasta bréfið þitt. Pað hefur dregizt fyrir mér
að svara því bréfi vegna próf-anna. Nú er því oki létt af mér, svo að
nú get ég notið mín betur en ella. Pegar maður er búinn að anda að
sér kolaryki í sex mánuði og láta troða fróðleiksrusli í allar smugur
sálarinnar, þá finnur maður fyrst, hvað loftið og útsýnið í sveitinni
er lífgandi og hressandi. - Ég er hér á sömu stöðvum og í fyrra.
Hér er óbrotinn bændalýður, sem enn hefur ekki fengið nasasjón
af dýrðinni í bæjunum og gjörir ekki eins háar kröfur og þeir sem
lengra eru komnir upp eftir menningarstiganum. Kann ég því
fremur vel við mig, úr því sem ráða er.