Árbók Landsbókasafns Íslands - Nýr flokkur - 01.01.1992, Side 98

98
FINNBOGI GUÐMUNDSSON
hann hefir getið þess að nokkru við bréfvin sinn í Winnipeg, þann
sem hann reit fyrst um þetta.
Ég hefi átt annríkt fyrirfarandi „innanum kýr og kálfa“ á
daginn, eins og gamli sveitungi minn séra Bergmann sagði, en
búsáhyggjur á kveldin og nóttunni og kvæðabænir frá þremur
blöðunum okkar vestrænu, sem ætla að „stássa“ um jólin eða
nýárið. Ég vildi gjarnan vera rausnarmaður í öllu, en bý andlega
og bóndalega eins: „frá hendinni til munnsins“, á sjaldan kvæði
fyrirliggjandi; ég geri þau vanalega með annarri hendinni, ef ég
hefi tíma til, og farga þeim samstundis í blað með hinni. Það er
von, að illa sé heflað, og margt óheflað.
Ég hefi skrifað þessa þráðleysu illa og í hjáverkum. Fyrirgefðu,
hve hún er málamyndarleg. Láttu mig frétta frá þér, ofurlítið, um
eða fyrir jól, ef þú hefir tíma og skap til. Þú þarft ekki að vanda mér
borgunina, núna - bara hvernig þér líður.
Svo óska ég þér glaðrar hátíðar og góðrar framtíðar, af heilum
hug.
Þinn einl.
Stephan G. Stephansson.
Sigurður Pétursson skáld var langafabróðir Stephans Guttormssonar, eins og
fram kom í bréfi hans 9. ágúst 1901. Langafi Stephans var Guðmundur
Pétursson sýslumaður í Krossavík.
Húsavick P.O., Man.
23. desember, 1901.
Stephan G. Stephansson, Esq.
Tindastóll, Alta.
Góði vinur!
Bréfið þitt, dags. 15. nóv., fékk ég með góðum skilum, og læt ég
miða þennan flytja þér kærar þakkir fyrir það bréf og eins alla
velvild þína til mín. Bréfi þínu hef ég ekki svarað fyrri, vegna þess
að ég hef ekki haft næði til þess fyrr en nú að ég er heima hjá mér.
Ég hóf skólagöngu með byrjun nóvembermánaðar, og varð mér
þá fyrst fyrir að ná hinum, er komnir voru á undan mér. Svo var
búinn til úr mér hálfnauðugum þjónn eða undirtylla greifa
nokkurs í leikriti, sem Stúdentafélagið hefur haft á prjónunum
upp á síðkastið. Svo komu jólaprófm, sem mér er hundslega við
eins og flest próf; en af því leikið var prófvikuna, varð ég að vaka
langt fram á nætur. Afleiðingin er sú, að ég hef enn stírur í augum.