Þjóðmál - 01.03.2018, Blaðsíða 96

94 ÞJÓÐMÁL Vor 2018
Bókarýni
Magnús Þór Hafsteinsson
Gagnleg bók
en morandi
í prentvillum
Fiskveiðar – fjölbreyttar áskoranir
Höfundur: Óli Samró
Þýðandi: Hjörtur Gíslason
Útgefandi: Óli Samró
Reykjavík, 2017
187 bls.
Það hefur lengi verið þörf fyrir að teknar
væru saman í eina bók á íslensku lýsingar á
þeim útfærslum sem þjóðir heims hafa kosið
sér í fiskveiðistjórnunarmálum.
Í fyrrasumar kom út hér á landi bók sem
einmitt er ætlað að varpa ljósi á það hvernig
ólík lönd hafa kosið að haga skipulagi sínu
og stjórnun innan sjávarútvegsins. Bókin
heitir Fiskveiðar og fjölbreyttar áskoranir
og er eftir færeyska viðskiptafræðinginn
Óla Samró, sem hefur um margra ára skeið
sinnt fjölbreyttri ráðgjöf í sjávarútvegi bæði
í Færeyjum og víða um heim. Óli hefur
unnið bæði fyrir einkaaðila og stjórnvöld.
Sem formaður nefndar sem leggur til fjölda
sóknardaga færeyskra fiskiskipa í lögsögu
Færeyja var hann um margra ára skeið einn
af lykilmönnum í færeyskri fiskveiði stjórnun.
Með störfum sínum hefur Óli aflað sér
víðtækrar þekkingar á sjávarútvegsmálum og
fiskveiðistjórnun á alþjóðavettvangi.
Árið 2015 hófst Óli handa við að taka saman
í eina bók lýsingu á því hvernig 18 valin lönd
eða ríkjasambönd stýra sjávarútvegsmálum
sínum. Þetta eru Færeyjar, Ísland, Noregur,
Evrópusambandið, Danmörk, Marokkó,
Máritanía, Namibía, Falklandseyjar, Kanada,
Bandaríkin, Perú, Síle, Japan, Suður-Kórea,
Nýja-Sjáland, Ástralía og Óman. Óli skrifar
í inngangi að ákveðið hafi verið að fjalla
einungis um lönd þar sem skipan fiskveiða
sé hluti af opinberri lagasetningu og sem
eru skrásett hjá Landbúnaðar- og matvæla-
stofnun Sameinuðu þjóðanna (FAO). Auk
kafla um einstök lönd er svo í bókarbyrjun
stutt yfirlit um þróun fiskveiðistjórnunar og
þá grundvallarhugmyndafræði sem liggur að
baki því að menn telja nauðsynlegt að stýra
sókninni í fiskistofnana. Bókin var gefin út í
Færeyjum sumarið 2016 og svo ári síðar hér á
Íslandi í þýðingu Hjartar Gíslasonar, sjávar-
útvegsblaðamanns til margra ára á Morgun-
blaðinu en nú á vefmiðlinum kvotinn.is.